Кэнчээри кэскилин ситимниир, өбүгэ үгэһин түстэһэр олоҥхо олимпиадатын сонуннара
Кулун тутар 2 күнүгэр “Айыы Кыһата” национальнай гимназияҕа саханы саха дэппит, үйэттэн үйэҕэ бэриллэн испит норуоппут тылынан уус-уран айымньытын муҥутуур чыпчаала олоҥхону үйэтитэр сыаллаах “Тыыннаах тыл” бырайыак чэрчитинэн аан бастакытын куорат оскуолатын үөрэнээччилэригэр олоҥхо олимпиадата ыытылынна. Бу түһүлгэҕэ Дьокуускай куорат араас оскуолаларыттан 5-10 кылаас үөрэнээччилэрэ күөн көрсөн олоҥхоҕо билиилэрин тургутустулар. Олимпиада үөрүүлээх аһыллыытыгар “Айыы Кыһата” гимназия дириэктэрэ Шамаева Л.П оҕолорго эҕэрдэ тылын тиэртэ, ситиһиини баҕарда. 6 кылаас уоланнарын бөлөҕө хоһоон аахтылар, фольклор салайааччыта С.М.Нохсорова тойугунан эҕэрдэлээтэ.
![]() |
Дьүүллүүр сүбэҕэ Н.Донской аатынан үөрэҕи сайыннарар уонна идэни үрдэтэр институттан филология кафедратын старшай преподавателэ Ф.В.Ядрихинская, үөрэх мэтиэдикэтин салайааччыта А.М.Саввинова, М.К.Аммосов аатынан ХИФУ төрүт омуктар тылларын үөрэтэр үнүстүүт 2 курсун устудьуона, РЛИ куратора И.А.Данилов үлэлээтилэр. Уопсайа 115 сайаапка киирбититтэн 11 оскуолаттан 90 үөрэнээччи кытынна. Бу аан бастаан тэриллибит олимпиада салгыы тэнийэн, кэҥээн өрөспүүбүлүкэ таһымыгар ыытыллар буолуо. Дьэ оччоҕо, кырдьык даҕаны, кэнчээри ыччаппыт бэйэтин норуотун чулуу айымньытын билэр, онон киэн туттар, өбүгэтин үгэһин умнубакка көлүөнэттэн көлүөнэҕэ тиэрдэр буолуо диэн эрэнэбит. Норуот суруйааччыта Күннүк Уурастыырап эппитин курдук:
Саллар саас тухары олоххо
Саханы үрдэтиэ олоҥхо,
Кэс тылбыт кэскилин көрдөрүө,
Кэхтибэт кэрэтин сөхтөрүө!
Айыы Кыһата оскуола.