Оскуола иннинээҕи үөрэхтээһин үбүлүөйдээх сылын түмүктүүр кэрэ-бэлиэ күнүгэр аналлаах тэрээһин ыытылынна.
Ахсынньы 4 күнүгэр саха тылынан иитэр-үөрэтэр уһуйааннар иитээччилэригэр, төрөппүттэригэр уонна кыраачааннарга дьоро күн буолан ааста.
Саха ыччата оҕо эрдэҕиттэн норуотун тылын барҕа баайын, үтүө үгэстэрин этигэр-хааныгар иҥэриннэҕинэ, амарах сүрэҕин, мындыр өйүн, уран тарбаҕын утумнаатаҕына эрэ саха омук быһыытынан чэчирии сайдара саарбаҕа суох. Кэнники сылларга Сахабыт Өрөспүүбүлэкэтин оҕону иитэр тэрилтэлэригэр үлэ бэрт тэтимнээхтик, саҥа суоллары арыйан ыытыылара бэлиэтэнэр.
Саха Өрөспүүбүлэкэтин министрэ Ф.В. Габышева уурааҕынан 2015 сыл оскуола иннинээҕи үөрэхтээһин сылынан биллэриллибитэ. Бу сыл үтүмэн элбэх былааннаах улэлэр бардылар. Сүрүннүүр түмүктүүр тэрээһиннэр ахсынньы 23-24 буолуохтара.
Бүгүҥҥү тэрээһини Дьокуускай куорат сахалыы тылынан иитэр-сайыннарар уһуйааннарын педагогтарын Ассоциацията тэрийэн ыытта.
2013 сыллаахха Дьокуускай куорат баһылыга А.С. Николаев уурааҕынан “Совет национальных образовательных учреждений” тэриллибитэ. Онно улахан былаан ылыллыбыта: сылтан сыл аайы Дьокуускай куоракка саха тыллаах группалары, детсадтары элбэтэргэ диэн. Ол иһин иитээччилэр бэйэ бэйэлэригэр көмөлөһөр сыалтан ассоциация тэриммиттэрэ. Ассоциация бэрэссээдэтэлинэн Захарова С.М. “Кэскил” уонна солбуйааччынан Трофимова Ю.И. “Мичээр” сахалыы тылынан иитэр-сайыннарар уһуйааннар сэбиэдиссэйдэрэ талыллыбытара.
Трофимова Ю.И. бэйэтин этиитигэр Дьокуускай куорат сахалыы тылынан иитэр-сайыннарар уһуйааннарын педагогтарын Ассоциациятын аатыттан национальнай оскуолалар институтугар, М.К. Аммосов аатынан ХИФУ пединститут,педколледж преподавателларыгар, уһуйааччыларга киэҥ араҥаҕа тарҕатар үлэлэригэр биир санаанан кыттыһан, өйөөн сүбэ-тирэх буолалларынан Дьокуускай куорат Уокуругун дьаһалтатын үөрэххэ Управлениетын начальнига Петров В.В., Ассоциация бэрэссэдээтэлэ Захарова С.М. аатыттан Махтал суруктары туттарда.
Бу күн оскуола иннинээҕи үөрэхтээһин 95 үбүлүөйдээх сылынан уонна уопут атастаһыы быһыытынан быыстапка-дьаарбанка буолла. Өссө биир ситиһиинэн “Уһуйууга онхуллар» диэн иитээччилэргэ көмө матырыйаал тахсыбытын Трофимова Ю.И. билиһиннэрдэ. Манна былырыын уһуйааннар икки ардыларыгар буолбут конкурс түмүктэрэ тиһиллибит.
Үлэҕэ үрдүк ситиһиилэринэн Захарова О.И. Саха Өрөспүүбүлэкэтин Үөрэҕин министерствотын аатыттан Герасимова А.Р. 51 нүөмэрдээх “Кэскил”, Флегонтова С.Н. 26 нүөмэрдээх “Кустук”, Афанасьева Нь.Г. 7 нүөмэрдээх “Остров сокровищ” иитээччилэригэр “Саха Өрөспүүбүлэкэтин Үөрэҕин туйгуна” бэлиэлэри туттарда.
Бэртээхэй тэрээһини кырачаан иитиллээччилэр ырыанан-тойугунан киэргэттилэр.
Дьокуускай куорат Уокуругун
дьаһалтатын Үөрэххэ управлениета.
