Арчыына Заболоцкая “Олоҥхо алыба” быыстапката
Сэтинньи ый 24 күнүгэр «Олоҥхо» нэдиэлэтин чэрчитинэн, биһиги лицейбитигэр биир дьоһун күн үүннэ. Ол курдук 8 «а» кылаас туйгун үөрэнээччитэ Арчыына Заболоцкая айар быыстапкатын арыйар үөрүүлээх түгэнэ буолан ааста.
Хас биирдии киһи орто дойдуга туох эрэ талааннаах төрүүр, дьоҕурдаах кэлэр: ким ыллыыр, ким үҥкүүлүүр, ким айар, ким уруһуйдуур… Онтон Арчыына кыра оҕо эрдэҕиттэн оҕуруону сөбүлээн тиһэр.
Арчыына сахалыы тыыннаах дьиэ-кэргэҥҥэ төрөөн сахалыы куттаах-сүрдээх сэмэй, сымнаҕас кыыс, билигин улаатан дьонугар туһа киһитэ. Бииргэ төрөөбүт иккиэлэр. Арчыына саҥа-иҥэтэ суох сылдьан, куруутун тугу эрэ саҥаны айбыт-туппут киһи диэн баҕа санаалаах. Ийэтэ кыыһын дьикти талаанын таба көрөн, 1 кылааска кэлээтин кытта, “Оҕуруонан тиһии” куруһуогун салайааччытын Альбина Мартовналыын билиһиннэрэр. Аан маҥнайгы үлэтэ «Лыах-айылҕа киргэлэ» диэн панно. Билигин оскуола музейыгар турар.
Күн бүгүн кини оҕуруонан кыыс киэргэллэрин, хартыыналары оҥорор. Киһи сэҥээрэ көрөр хартыыналарын быыһыгар, Былатыан Ойуунускай мэтириэтэ бу баардыы көрөн олорор. Бу үлэтин Ойуунускай 120 сааһыгар анаан тиспит. Мэтириэккэ үрүҥ, хара, күрүҥ өҥнөөх оҕуруолар дьүөрэлэһэн, поэт мөссүөнүн тыыннааҕымсытан көрдөрөргө дылылар. Былырыыҥҥы үөрэх дьылыгар “Былатыан Ойуунускай мэтириэтэ” үлэтэ Москва куоракка “Рассударушка” илии оҥоһугун күрэҕэр бастаабыта.
Ону ааһан, аныгы матырыйаалынан куукулалары (олоҥхо геройдарын) оҥортоото. Бу үлэтинэн «Инникигэ хардыы», политехническай НПК-ларга кыттан кэккэ ситиһиилээх. Аны кыыс киэргэлин - баттах туттарары бэйэтэ айан, уран тарбахтарынан имитэн, оһоххо буһаран, хатаран, кырааскалаан дьон-сэргэ дьүүлүгэр таһаарда. Онон Арчыына өрүү саҥаттан саҥа үлэ оҥорон, айан-тутан иһэрэ үөрдэр.
Бүгүҥҥү быыстапка оҕо-аймах, дьон-сэргэ биһирэбилин ылыан ылла.
Саха политехническэй оскуола иьитиннэрэр
