“Ийэ тылым алгыһынан” семинар-практикум

 2012 сыллаахха Дьокуускай куораттааҕы оҕо айымньытын Дыбарыаһыгар этнокултуура киинэ тэриллэн, олус айымньылаахтык уонна таһаарыылаахтык үлэлээбитэ номнуо 5 сыла буолар. Киин тэриллиэҕиттэн Ийэ тыл декадатын иһинэн сыл ахсын араас таһымнаах семинардары тэрийэр, республика, куорат үгүс саха тыллаах учууталларын түмэ тардар, баай уопутун билиһиннэрэр.

 Олунньу 16 күнүгэр П.А.Ойуунускай аатынан государственнай литературнай музейга «Тыыннаах тыл” куруһуок уһуйааччыта Яковлева Л.С. “Ийэ тылым алгыһынан” семинар-практикуму тэрийэн ыытта. Бу семинар оҕону төрөөбүт тылга, ааҕыыга дорҕоонноохтук ааҕыы нөҥүө сыһыарыахха сөбүн көрдөрдө.

 Дорҕоонноохтук ааҕыы, дьон иннигэр сирэй-хамсаныы нөҥүө иэйиини тиэрдии, үгүс киһи ортотугар санааны толлубакка эрэллээхтик этии- барыта тыыныы, уос-тиис, сирэй-харах эрчиллиилэрин кытта ыкса ситимнээҕэ дакаастанна. Семинар кыттыылаахтара бу дьарыктары устан, хаартыскаҕа түһэрэн, биир да сүбэни мүччү туппакка сурунан бардылар, тэҥҥэ оҥордулар.

  Эбии үөрэхтээһин Дьарыгы тэрийэр тутулун, тосхолун истээччилэр оҕо оруолугар киирэн салгыы тэҥҥэ үлэлэстилэр. Хоһоон тутулун ырытыы уустугун, саха тылын имэҥнээх илбистээх тыынын үөрэнээччигэ Дьарык быһыытынан тиэрдиэххэ сөбүн семинар иккис чааһа көрдөрдө.

 Тыыннаах тыл куруһуок үөрэнээччилэрэ саха суруйааччыларын, буойун-поэттарын үгүс айымньыларын араас конкурстарга, тэрээһиннэргэ олус уратытык, иэйиилээхтик ааҕан үгүс дьон кутун туталлар. П.Тобуруокап, А.Бродников, С.Данилов “Барыта эн эбээт”, “Мин дойдум”, П.А.Ойуунускай “Уруйа улааттын”, “Эрэнэбин, итэҕэйэбин” уо.д.а. айымньыларынан туруоруллубут дьүһүйүүлэр хас биирдии истээччини долгутта.

  Салгыы “Сэттэ тыл кустуга” диэн ааттаан Лина Семеновна үлэтин ис хоһоонун кытта билсиһии буолла. Ол курдук, Дьокуускай куорат 12 оскуолатын түмэ тардан, хас биирдиилэрин араас бырайыактарынан “Ааҕар дьиэ кэргэн”, “Остуоруйа дойдутугар”, уо.д.а. үлэлэтэр.

Бүгүн эбии үөрэхтээһин оскуоланы, төрөппүтү, атын эйгэ тэрилтэлэрин оҕо туһугар биир сомоҕо, күүс-көмө гынан ситимниирэ көһүннэ диэн истээччилэр сыаналаатылар. Институт доцена Шишигина В.Р. семинар үрдүк таһымнааҕын бэлиэтээтэ, билиҥҥи ФГОС ирдэбилинэн аныгы уруоктар бу маннык Дьарык хабааннаах буолуохтаахтарын тоһоҕолоото.

Винокурова Т.С., директоры үөрэх чааһыгар солбуйааччы.