“Байанай” оҕо спартакиадата – Дьокуускайга

Аҕыйах сылтан бэттэх Саха сиригэр Булчут күнүн бэлиэтиир буолбуппут кэннэ, оскуола эйгэтигэр ити күн хайдах сыһыаннаах, туох майгылаах буолуон араас тэрээһиҥҥэ көрөн кэллибит. Олортон ойуччу турааччылара, биллэн турар, Саха Республикатын “Байанай” оскуола үөрэнээччилэрин булчут сатабылларыгар спартакиадата.

Былырыын бу күөн күрэскэ Дьокуускай куорат аатыттан “Айыы Кыһата” хамаандата эрэллээхтик кыайан, быйылгы түһүлгэ – Ытык Туймаада эбэ хотун киэҥ туонатыгар ыытылынна. Булт – төрүт олохтоох омук сүрүн үгэһин быһыытынан, 6 улуустан спартакиадаҕа кэлбит 8 хамаанда – “Бэйэни билиһиннэриигэ”, “Булт сатабылларыгар”, “Түсүһүүлээх сырсыыга” уонна “Уот оттууга” илин-кэлин түсүһэн, бастыҥ аатын былдьастылар.

Тэрийээччилэр – СР Үөрэҕин министэристибэтин “Айылҕа харыстабылыгар, туризмҥа уонна агротехнологическай үөрэхтээһиҥҥэ республикатааҕы киинэ”, СР Айылҕа харысталыбын министиэристибэтэ уонна “Айыы Кыһата” оскуола быйылгы спартакиаданы биир тэтиминэн, биир тыынынан дьону түмэн, сааһылаан ыыппыттара – тэрээһин сэргэх, үрдүк таһымнаах буоларын ситистэ. Ол курдук, “Айыы Кыһата” хамаанда таһынан, П.И.Кочнев аатынан Тулаҕы орто оскуолата, Хаҥалас улууһун С.П.Ефремов аатынан Булгунньахтаах орто оскуолата, А.В.Дмитриев аатынан Ой орто оскуолата, Намтан Салбаҥ уонна Модут орто оскуолалара, Горнайтан Кировскай орто оскуолата, Амматтан В.М. Новиков-Күннүк Уурастыырап аатынан Эмис орто оскуолатын 7-10 кылааһын үөрэнээччилэриттэн састааптаах биэстии оҕолоох хамаандалара маҥнай оҕо айымньытын дыбарыаһыгар Бэйэлэрин билиһиннэрдилэр уонна “Булт сатабылларыгар” – тыы үрдэриитигэр, кыыл-көтөр аатын-суолун билиигэ, тутум эргииргэ күрэстэстилэр.

Эбиэттэн киэһэ бары айылҕаҕа тахсан, өрүү ордук улахан болҕомтону ылар, оҕолору кынаттыыр гына өйдөнөн хаалар – эстафетаҕа уонна уот оттууга илин-кэлин түһүстүлэр. Сынньалаҥ кэмигэр “Айыы Кыһата” Аҕа Сүбэтэ бэлэмнээбит аһын-үөлүн оҕолор да, улахан да дьон астына-дуоһуйа, чэбдик салгыҥҥа олорон тото-хана аһаатылар.

Түөрт түһүмэх түмүгүнэн бастакы миэстэни – Дьокуускай куораттан “Айыы Кыһата” ылан 10000 суммалаах бириэмийэнэн, иккис миэстэни эрэллээхтик Амматтан Эмис орто оскуолатын хамаандата ылан 7000 суммалаах бириэмийэнэн, итиэннэ бэрт кыранан хаалан үһүс миэстэни Горнайтан Кировскай оскуолатын хамаандата ылан 3000 суммалаах бириэмийэнэн наҕараадаланнылар.

Көрүҥнэринэн кыайбыт хамаандаларга судьуйалар – “Чороон 21-с үйэ” хампаанньаттан (салайааччы Попова С.Т.), “Аар Тайҕа” хаһыат редакциятыттан, “Айыы Кыһата” Аҕа Сүбэтиттэн (салайааччы Соров А.М.) сыаналаах бириистэри, мэтээллэри туттардылар. Оттон кыайыылаах хамаандаҕа – норуот маастара Егор Степанов анаан оҥорбут, Байанай уобарастаах көһө сылдьар “Дуоҕа Бэлиэ” туттардылар. Маны таһынан, биирдиилээн хамаандалар өйдөбүнньүктээх уонна анал бэлэхтээх бардылар.

Тэрийээччи учууталлар уонна аҕалар – Ил Түмэн, Үөрэх уонна наука министерствотын, Дьокуускай куорат Үөрэххэ управлениетын Почетнай грамотатынан уонна Махтал суругунан бэлиэтэннилэр.

Рустам Каженкин,

“Айыы Кыһата” оскуола дириэктэрин иитэр үлэҕэ солбуйааччы