Саха гимназиятыгар уолаттары эр киһи буоларга уһуйаллар

 2017 сыл кулун тутар 18 күнүгэр Дьокуускай куораттааҕы  Саха гимназиятыгар биир сонун тэрээһин буолан ааста.  Бу оскуолаҕа ааспыт сыл алтынньы ыйыттан  саҕалаан «Бэргэн» диэн  уолаттар түмсүүлэрин бырайыага үлэтин саҕалаабыт. Бөлөх салайааччыта, ааптара Россия Үөрэҕириитин бочуотаах үлэһитэ,Саха республикатын үөрэҕириитин туйгуна, Саха сирин мэтэдииһэ  Скрябина Татьяна Артамоновна . Бу тэрээһиҥҥэ “Төлкө”Мэҥэ Хаҥалас улууһун эр дьонун түмсүүтэ ыалдьыт быһыытынан ыҥырыллан кэлбиттэрэ олус кэрэхсэбиллээх.

  Бу түмсүү сүрүн хайысхатынан уол оҕону иитии буолар. Бэргэҥҥэ 1-5 кылаастартан  60-ча о5о дьарыктанар. Татьяна Артамоновна маҥнай уолаттары дорҕоон тутулуттан саҕалаан, тылы –өһү сатаан туттарга , саха баай тылыгар уһуйар. Манна саха тылынан ыраастык, этии бэрээдэгинэн кэпсэтэргэ үөрэтэр. Тиэкиһи кытта үлэ барар.  Бэргэннэр бастакы ситиһиилэринэн  “Бриллиантовые нотки” бэстибээлгэ бастакы истиэпэннээх лауреат аатын сүкпүттэрэ буолар.

 Оттон кулун тутар 18 күнүгэр “ Бэргэн” уолаттар түмсүүлэрин киэҥ эйгэҕэ билиһиннэрэр үтүө күннэрэ буолла. Бу сүрэхтэниини Инга Валерьяновна Хомподоева салайан ыытта. Бу күн хас биирдии уол чахчы “Бэргэн” чилиэнэ буолбутун туоһулуур дастабырыанньаны тутта.

 Бэргэннэр 44 буолан бары биир киһи курдук тэбис–тэҥҥэ Сэргэй Васильев–Бороҕоонускай олоҥхотун хуорунан аахтылар. Уолаттары олоҥхолуурга Татьяна Артамоновна бэйэтэ үөрэтэр.Уопуттаах учуутал олоҥхо тылын нэһилиэстибэтин  хас биирдии оҕоҕо тиэрдэр сыалтан хуорунан бары тэбис тэҥҥэ ааҕалларын ситиһэр. Сонун толорууттан Эрчимэн Бэргэн олоҥхо саҥа тыыннаммыкка дылы буолла. Татьяна Артамоновна этэр:  “Саамай киһи кэрэхсиирэ диэн, оҕолор дьарыкка үөрэн- көтөн туран кэлэллэр. Сөҕүөм иһин түргэнник ылыналлар, олоҥхо тылларын сөбүлүүллэр. Күннээҕи олоххо уу сахалыы саҥаралларын, сорох түгэҥҥэ олоҥхо тылын тутта сатыылларын ирдиибин. Ситиһии биир төрүөтэ оҕо бэйэтин санаатын сатаан төрөөбүт тылынан кэпсиир, саҥарар дьоҕуругар сытар. Бастакы кылаастар Саҥа дьыл кэнниттэн дьарыктаммыттара. Билигин бэйэлэрин таһымнарыгар сөптөөх Бүөтүр Тобуруокап айымньыларын ааҕаллар. Биһиги уолаттарбыт улаатан, ыал баһылыга, тэрилтэлэр бас-көс үлэһиттэрэ, ол эбэтэр төрөөбүт дойдуларыгар туһалаах буолалларыгар сэмэй кылааппытын киллэрэр туһуттан үлэлии –хамныы сылдьабыт. »- диэн кэпсиир , санаатын үллэстэр.

  Тэрээһин иккис түһүмэҕэр   Бэргэннэр  Мэҥэ Хаҥалас «Төлкө» эр дьон  түмсүүтүн кытта бииргэ үлэлииргэ дуогабар түһэристилэр. Дуогабарга  Саха гимназия дириэктэрэ, Софронеева Валентина Васильевна уонна Төлкө түмсүү салайааччыта Румянцев  Иван Иванович  илии баттастылар. Ол курдук “Төлкө” түмсүү базатыгар  “Бэргэннэр” эр киһи үлэтин-хамнаһын кытта билсиэхтэрэ. Тыаҕа сайылаан, өбүгэлэрин төрүт дьарыктара диэн тугун эттэринэн –хааннарынан билиэхтэрэ. Куйуурга, муҥхаҕа сылдьыахтара. Ол курдук “Төлкөлөр”  “Бэргэннэри” бэйэлэрин кынаттарын анныгар ылыахтара.  

Саха гимназия