Төрөөбүт тыл - сайдыы түһүлгэтэ

Олунньу 16 күнүгэр Саха гимназиятыгар Үөһээ Бүлүү улууһун саха тылын уонна литэрэтиирэтин учууталларын төрөөбүт тылга уонна төрүт үгэсгэ анаммыт сылларын үлэтин түмүктүүр уонна ССРС народнай учуутала М.А.Алексеев  100 сааһын көрсө  «Төрөөбүт тыл - сайдыы түһүлгэтэ» тэрээһинэ буолла.

Бу тэрээһини C. Н. Донской аатынан үөрэх үлэһиттэрин идэтин үрдэтэр үнүстүтүүт үүннээн-тэһииннээн ыытта, методист Шишигина В.Р. кууруска үөрэнэр өрөспүүбүлүкэ араас сирдэриттэн сылдьар учууталлары ыҥыран, киэҥ эйгэни тэрийдэ, уопут атастаһыытын олохтоото.

Сыала-соруга:

• Үөһээ Бүлүү улууһун саха тылын уонна литэрэтиирэтин учууталларын төрөөбүт тылга уонна төрүт үгэскэ анаммыт сылларын үлэтин түмүктээһин.
• Оскуолалар икки ардыларыгар ситим тутуу, уопут атастаһыы.
• Төрөөбүт тылы, литэрэтиирэни, төрүт үгэһи үөрэтиигэ, уһуйууга  тирээн турар кыһалҕалары кэпсэтиһии, саҥа хайысхалары тобуларга, тэрийиигэ сүбэлэһии.

Ыытыллыбыт үлэ көрүҥнэрэ: аһаҕас дьарыктар, маастар кылаастар, лиэксийэ, төгүрүк остуол, быыстапка., литературнай-музыкальнай салон. Күн бастакы аҥарыгар 9 аһаҕас уруок, 4 маастар кылаас, эбии дьарык уонна “Иэйии” литэрэтииринэй салон ыытылынна. Тарагаева Надежда Николаевна, Мойтохонова Айталина Михайловна оһуохай ньымаларыгар, Никифорова Татьяна Кирилловна “Олоҥхо ис номоҕо... Тылын тилиннэрии...”, Андреева Матрена Пантелеймоновна “С.П.Данилов “Сүрэх тэбэрин тухары”, Анисимова Маргарита Николаевна “Тиэкиһи кытта үлэ” уонна да атын уруоктары ыытан көрдөрдүлэр.

Саха гимназиятыгар үгэскэ кубулуйбут “Иэйии” литэрэтииринэй салон бу сырыыга тиэмэтин “Ырыа, үҥкүү аргыстаах учууталлар” диэн быйылгы үөрэх дьылыгар үлэлии кэлбит араас предмет учууталларын талааннарыгар анаата. Учуутал айар куттаах, талааннаах дьоҕурдаах, кэрэни кэрэхсиир,  айымньылаахтык үлэлиир эрэ буоллаҕына саҥа тыллан эрэр оҕо дууһатыгар ыраас сырдык иэйиини уһугуннарар диэн санааттан “Иэйии” салонтан үктэллэнэн, элбэх учуутал, үөрэнээччи, төрөппүт хоһоон-ырыа айар, биир ситимнэнэр, тыыннанар. Кэлбит ыалдьыттар “Тыллыы” устуудьуйа иитиллээччилэрэ Варвара Потапова хоһооннорун иэйиилээхтик аахпыттарын, учууталлар бэйэлэрэ айбыт ырыаларын олус биһирээтилэр, истиҥ-иһирэх тыллары эттилэр.

Күн иккис аҥарыгар “Сахалыы тыын иитиллэр эйгэтэ”  Попов Григорий Григорьевич – Боотой, “Удьуор утума” Корякин Николай Павлович – Уран Ньукулай лиэксийэлэрэ, төрөөбүт тылы, литэрэтиирэни, төрүт үгэһи үөрэтиигэ, уһуйууга  тирээн турар кыһалҕалары кэпсэтиһии, саҥа хайысхалары тобуларга, тэрийиигэ сүбэлэһии, төгүрүк остуол буолла. Кэпсэтиигэ Алексеев  Василий Иванович- Бааһынай Баһылай, Хобусаров Софрон Романович, Васильев Валерий Васильевич – Муттуххай Бороҥ бэйэлэрин санааларын эппиттэрэ кэрэхсэннэ.

Тэрээһин доҕордоһуу оһуохайынан түмүктэннэ.

Саха гимназията