Босиковскай ааҕыылар

Олунньу 7 күнүгэр Василий Иванович Босиков – Василий Босяк – Саха Өрөспүүбүлүкэтин Үтүөлээх учуутала, Учууталлар учууталлара, поэт, суруйааччылар сойуустарын чилиэнэ, общественник, төрөөбүтэ 80 сааһа. Бу күнү көрсө Саха политехническай лиссиэйгэ “Босиковскай ааҕыылар” үөрүүлээхтик аһылынна.

Бу тэрээһин “Ыра санаам кыната” литературнай-музыкальнай дьүһүйүүнэн  саҕаланна. Композицияҕа алын сүһүөх кылаас үөрэнээччилэриттэн саҕалаан, оскуоланы быйыл бүтэрэр оҕолорго тиийэ итиэннэ оскуола учууталлара кыттыыны ыллылар. Ахсаан учуутала Собакин Афанасий Иванович ыытааччы буолла, Стрекаловская Туйаара Алексеевна кырачаан үөрэнээччилэрэ бэрт сэргэхтик туттан-хаптан хоһоон ааҕан, Эверстова Нюргуяна Тихоновна кылааһын оҕолоро үҥкүүлээн,  дьон сэҥээриитин ыллылар. Алын сүһүөх учуутала Тимофеев Владимир Владимироваич учуутал уобараһын көрдөрдө, Степанова Вероника Александровна поэт биир истиҥ ырыатын олус иэйиилээхтик ыллаан, истээччи биһирэбилин ылла, Лобанов Айаал Валерьевич “Учуутал доҕорбор” ырыатын мустубут учууталларга анаата. 11 “б”,9 “а”, 10 “а”, 11 “в” кылаас үөрэнээччилэрэ поэт хоһооннорун ис сүрэхтэриттэн ааҕан иһитиннэрдилэр. 11 “б” үөрэнээччитэ Пак Нарико хомуска маастардыы дьүрүһүтэн көрөөччүлэри сөхтөрдө. 10 “б” кылаас үөрэнээччилэрэ поэт хоһооннорун аангылыйа тылынан тылбаастаан, дьон дьүүлүгэр таһаарбыта эмиэ биир ураты көстүү буолла.

СПЛ ансаамбыла лиссиэй өрөгөй ырыатынан "Босиковскай ааҕыылар" аһыллыытын өрө көтөҕүллүүлээхтик түмүктээтэ.

Литературнай-музыкальнай композициябыт наһаа истиҥ, сылаас иэйиилээх буолла, бу үөрэнээччилэри, учууталлары өссө ордук түмсүүлээх оҥорор диэн бигэ санаалаахпыт.

Саха политехническай лиссиэй дириэктэрэ Надежда Константиновна Тимофеева алгыс тылын этэн, сахалыы иитии-үөрэтии суолталааҕын, тоҕоостооҕун бэлиэтээтэ. 

“Босиковскай ааҕыылар” чэрчитинэн “Иэйии, өрүкүйүү киһи олоҕор суолтата (В.Босяк хоһооннорунан)” (саха литературата, уйулҕа силбэспит уруок) 9кыл. көрдөрдүлэр Заболоцкая У.В., Собакина Л.В.

“Уолукпар оргуйар санаалар” (“Аман өс”) – Дьокуускай куорат оскуолаларын 10-с кылааһын үөрэнээччилэрин икки ардыларынааҕы Василий Босяк олоҕун, айар үлэтин арыйар ис хоһоонноох күөн күрэһи ыыттылар Поротова С.Е., Леонтьева Н.П. Дьүүллүүр сүбэҕэ үлэлээтилэр Иванова И.В., Охлопкова М.Е.

Ыалдьыттар бу тэрээһиннэри олус сэҥээрдилэр, сөхтүлэр, куорат оҕолоро төрөөбүт тылларынан хомоҕойдук саҥаралларыттан үөрэн, астынан тарҕастылар.

“Ымыылаах ыра санааларым” В.Босяк хоһооннорунан дьүһүйэн оҥорбут уруһуйдары сыаналаатылар Стрекаловская Т.А., Спиридонова З.И., Константинова Н.И.

“Улуу Суорун суолунан” методическай сэминээргэ Леонтьева Н.П., Поротова С.Е., Заболоцкая У.В., Осипова М.В. өрөспүүбүлүкэ саха тылын, литературатын учууталларыгар баай уопуттарын сырдатан, учууталлар махталларын ыллылар. 

Бүгүҥҥү күн сүрдээх тэрээһиннээхтик, үрдүк таһымнаахтык буолан ааста. 

Инникитин да биир сомоҕо буолан бииргэ үлэлиэҕиҥ, айыаҕыҥ, тутуоҕуҥ!