Дьокуускай куорат оскуолаларыгар сахалыы тылынан «Барҕарыы» пуонда билим кэмпириэнсийэ ыытыллыа

Дьокуускай куорат баһылыгын солбуйааччыта Наталья Степанова  сэтинньи 22 күнүгэр сахалыы тылынан “Барҕарыы” билим кэмпириэнсийэ куораттааҕы түһүмэҕин тэрийэр туһунан сүбэ мунньах ыытта. 

Кыттыыны ыллылар: “Барҕарыы” пуонда дириэктэрэ Афанасий Постников, дириэктэри солбуйааччы Мария Кириллина, Дьокуускай куорат Үөрэҕирии дьаһалтатын начальнигын солбуйааччы Мария Ли-цай, Дьокуускай куорат саха оскуолаларын салайааччылара.  
«Барҕарыы» билим кэмпириэнсийэ сыала – чинчийэр үлэ нөҥүө оҕо айар, ырытар, анаарар дьоҕурун, сахалыы саҥарар-толкуйдуур сатабылын сайыннарыы. Кэмпириэнсийэ үлэтин хайысхалара: Тыл үөрэҕэ, Педагогика уонна уйулҕа билимэ, Култуура уонна искусство, История, Кыраайы үөрэтии, айылҕаны харыстааһын, Биология уонна мэдиссиинэ, Математика, Физика, астрономия, Информатика, IT Технология, Химия, Тиэхиньикэ, Экономика, бэйэ оҥорон таһаарыы. Кэмпириэнсийэҕэ 7-11 кылаас үөрэнээччилэрэ кытталлар. 
Куораттааҕы түһүмэх 2024 сыл тохсунньу иккис аҥарыгар буолара быһаарылынна. Өрөспүүбүлүкэтээҕи түһүмэх 2024 сыл олунньу ыйыгар ыытыллар. 
Дьокуускай куорат сахалыы тыллаах оскуолалара аан бастакытын ыытыллар өрөспүүбүлүкэтээҕи «Барҕарыы» билим кэмпириэнсийэ тэрээһинигэр, үлэтигэр кыттарга бэлэмнэрин  биллэрдилэр.