“Тэтим чаас” аһаҕас биэриигэ төрөөбүт тыл сайдар саҕахтарын туһунан кэпсэтии буолла

Cэтинньи 16 күнүгэр “Тэтим чаас” диэн эдэр ыччакка аналлаах аһаҕас биэриигэ төрөөбүт тыл сайдар саҕахтарын туһунан кэпсэтии буолла.

Бу биэриигэ Дьокуускай куорат Саха политехническай лиссиэйин учуутала, куорат саха тылын, литэрэтиирэтин, культуратын холбоһугун салайааччыта Заболоцкая Ульяна Васильевна, «Айыы кыһата» оскуола учуутала, Липатова Светлана Афанасьевна уонна 26 №-дээх оскуола учуутала Борисова Марианна Николаевна бүгүҥҥү күҥҥэ сытыытык турар тыын боппуруостарга бэйэлэрин  санааларын эттилэр. Марианна Борисова бастакы сийиэс хаамыытын туһунан кылгастык кэпсээтэ. Төрөөбүт тылы үөрэтиигэ, оҕоҕо сахалыы тыыны иҥэриигэ сыһыаннаах дьаһаллар бу сийиэстэн тирэх ылбыттарын, маныаха сыһыаннаах үлэ элбэх хайысханан тэтимнээхтик  барарын туһунан сиһилии кэпсээтэ. 
Аныгыскы нэдиэлэҕэ, сэтинньи 22-24 күннэригэр буолаары турар саха тылын, литэрэтиирэтын, культуратын учууталларын иккис сийиэһигэр Дьокуускай куорат Үөрэххэ салалтатын эппиэттээх тэрээһиннэрин туһунан Ульяна Заболоцкая билиһиннэрдэ. Куорат оскуолаларын саха тылын учууталлара «Тыыннаах тыл» бырайыак аҕыс хайысхатынан үлэлииллэрин туһунан сырдатта. Сүрүн болҕомто куорат оскуолаларыгар сахалыы  иитии - үөрэтии олохсуйар суолларыгар уурулларын ыйда.  Төгүрүк остуолга ити боппуруостары ырытыһан, сөптөөх суолу-ииһи тобулуохпут диэн бөҕөх санаатын биллэрдэ. 
Светлана Липатова суруйааччылар айымньыларын ааҕыыга сыһыаннаах “Суруйааччылар айымньыларын ис хоһоонунан -хаартыскалар” диэн кэскиллээх,  инникилээх бырайыагын туһунан истээччи болҕомтотун тардар гына кэпсээтэ. Кини бу бырайыагар элбэх киһи, төрөппүттэр үлэлэспиттэрин ыйда. Айымньы сүрүн геройдарын «Айыы  кыһата» оскуола 8 кылааһын оҕолоро оонньоон, бу герой уобараһын итэҕэтиилээхтик көрдөрбүттэр. Атын уобарастары оскуола үлэһиттэрэ остуораһыттан, завхоһугар тиийэ  оонньообуттара – хайҕаллаах суол. 
Бу курдук биир санаанан түмсүүлээхтик үлэлиир буоллахха үлэ кыһалҕаларын быһаарыахха сөп эбит диэн түмүккэ кэлэбит.
Биэриигэ икки истээччи тылга, үөрэххэ сыһыаннаах  ыйытыыларыгар Борисова М. Н дьоһуннаахтык хоруйдаата.
Аһаҕас биэриини  араадьыйа, тэлэбиидэнньэ үлэһитэ Нюргуяна Ботуева олус үчүгэйдик тэрийэн, салайан ыытта. Онон түмүгэр бары да астынан тарҕастыбыт.