Бу 2022 сыл олунньу ыйыттан Дьокуускай куоракка «Тыыннаах тыл» бырайыак чэрчитинэн, куораттааҕы үөрэх салалтата уонна саха тылын, литэрэтиирэтин методическай холбоһугун көҕүлээһининэн “Литературнай салон” диэн ааттаах үөрэнээччилэр ааҕыыларын көрөр-истэр, уопут атастаһар үлэ 2 тэрээһинэ кулун тутар 21 күнүгэр куйаар ситим нөҥүө буолан ааста.
Тэрээһин саха бэйиэттэрин хоһооннорун оҕо сахалыы сатаҕайдык, уустаан-ураннаан, дорҕоонноохтук ааҕар сатабылын сайыннарар, салгыы үлэ саҥа хайысхаларын көрдүүр сыаллаах.
Литературнай салон үлэтигэр Дьокуускай куорат 12 нүөмэрдээх орто оскуолата уонна «Айыы Кыһата» кытыннылар.
«Элик бэртэрэ» диэн ааттаах бөлөх 12 оскуола уолаттара Семен Данилов «Олоҥхо оҕото» хоһоонун аахтылар. Маны сэргэ бу оскуолаттан Семенова Сандаара 11 «бкылааһын үөрэнээччитэ Семен Данилов «Үөрүү» диэн хоһоонун олус иэйиилээхтик туттан-хаптан аахта. Наталья Михалева-Сайа «Хаар ырыата» хоһоонун 11 кылааһын үөрэнээччитэ Софронов Георгий түһүлгэ кыттыылаахтарыгар бэлэхтээтэ. Оҕолору уус-уран ааҕыыга сирдээччи бу оскуола учуутала Клара Борисовна Ксенофонтова үлэтин туһунан сырдатта, үс хоһоон ааҕар уолаттарын бөлөҕүн уонна биирдиилээн ааҕааччыларын ситиһиилэрин кэпсээтэ. Учуутал оҕону төрөөбүт тылын таптыырга, кинини сахалыы тыынныырга хоһоону аахтарыы олус туһалааҕын бэлиэтээтэ. Бу оҕолору куонкурустарга эрэ анаан буолбакка, оскуола араас тэрээһиннэригэр, бырааһынньыктарга үгэс курдук аахтарарын туһунан кэпсээтэ.
«Айыы Кыһата» үөрэнээччилэрэ бу тэрээһини олус киэргэттилэр. Салайааччы – саха тылын уонна литэрэтиирэтин учуутала Липатова Светлана Афанасьевна. 8 кылааһын уолаттара Былатыан Ойуунускай «Ийэм Дьэбдьиэкэй уҥуоҕар» диэн хоһоонун бөлөҕүнэн ааҕан көрдөрдүлэр.
5 ылааһын үөрэнээччитэ Саввинова Нарыйаана-Куо олус истиҥник хатыҥ туһунан хоһоонун ааҕан истээччилэр сэҥээриилэрин ылла. Яковлева Айсена 10 кылааһын үөрэнээччитэ Степан Скрыбыкин-Чокуур сиэнэ «Сэрии ийэлэрэ» диэн хоһоону 8 мүнүүтэ устата ааҕан, барыбытын уйадытта, кэрэхсэттэ диэн Клара Борисовна Ксенофонтова 12 оскуола саха тылын уонна литэрэтиирэтин учуутала тоһоҕолоон эттэ. 2020 сыллаахха буолан ааспыт Дьокуускай куорат уонна Таатта улууһун оскуолара кыттыылаах Кыайыы 75 сылыгар аналлаах күрэхтэһиигэ Яковлева Айсена - Грант При кыайыылааҕа.
Маннык тэрээһиннэр буола турдуннар. Оҕо уус-уран ааҕыыны сэҥээрэр, таптыыр буоллаҕына, олохпут инникитэ сырдык буолара саарбаҕа суох.
Васильева А.Н. Дьокуускай куорат 33 №-дээх орто оскуола саха тылын, литэрэтиирэттин учуутала.
