Литературнай салон үлэтэ саҕаланна...

Олунньу 13 күнүгэр, төрөөбүт тыл уонна сурук-бичик күнүгэр аналлаах Дьокуускай куорат уонна Таатта улууһун оскуоларын саха тылын учууталлара кыттыылаах куйаар ситиминэн «Тыыннаах тыл» бырайыак чэрчитинэн ыытыллар литературнай салон бастакы түһүмэҕэ бэрт сэргэхтик буолан ааста. 

Бу тэрээһиҥҥэ Саха Өрөспүүбүлэтин Үөрэххэ  уонна наукаҕа миниистирэ Ирина Павловна Любимова,  Дьокуускай куорат Үөрэххэ салалтатын салайааччыта Алексей Климентьевич Семенов  уонна Таатта улууһун үөрэхтээһин сайдыытын салайааччытын солбуйааччыта Мира Николаевна Луковцева кытыннылар.  Литературнай салон үлэтин Үөрэхтээһин  сайдыытын отделын салайааччыта Ульяна Гаврильевна Сыроватская иилээн-саҕалаан ыытта. Тэрээһиҥҥэ Дьокуускай куораттан, Таатта улууһуттан 52 киһи кытыннылар. Литературнай салон үлэтэ Дьокуускай куорат саха тылын, литэрэтиирэтин, култууратын методическай холбоһугун салайааччыта, 26 нүөмэрдээх орто оскуолатын учуутала Марианна Николаевна Борисова Күннүк Уурастыырап «Олох» диэн хоһоонун ааҕыытынан саҕаланна. Учууталлар САССР тэриллибитэ Биллэр бэйиэттэр хоһооннорун Таатта улууһуттан 9, Дьокуускай куораттан 8 учуутал өрө күүрүүлээхтик, иэйэн-куойан туран  аахтылар. 

Тэрээһин түмүгэр Дьокуускай куорат Үөрэххэ салалтатын салайааччыта Алексей Климентьевич Семенов «Тыыннах тыл» бырайыагы салгыы сайыннаран, Таатта улууһун кытта  ыкса ситимнээхтик үлэлэһэрбитигэр ыҥырда.  Төрөөбүт тыл сайдарын туһугар, сахалыы эйгэни кэҥэтэн,  Дьокуускай куоракка  оҕолорго анаан,  ыҺыах тэрийэр туһунан баҕа санаатын биллэрдэ.
Таатта улууһун үөрэхтээһин сайдыытын салайааччытын солбуйааччыта Мира Николаевна Луковцева бу бырайыгы өйөөн, Дьокуускай куорат сахалыы тыллаах оскуолаларын бэс ыйыгар Таатта ыһыаҕар ыҥырда.

Саха Өрөспүүбүлэтин Үөрэххэ  уонна наукаҕа миниистирэ Ирина Павловна Любимова сахалыы саҥаны сайыннаран, араас тэрээһиннэри, күрэхтэһиилэри, мунньахтары төрөөбүт тылынан ыытарга сүбэлээтэ. Литературнай салон үлэтигэр тэрилтэ салайааччыларын, общественнай тэрилтэ үлэһиттэрин, төрөппүттэри кытыннарарга баҕа санаатын тириэртэ.
Бу үлэнэн биһиги киэҥ эйгэни хабан, сахалыы саҥаны сайыннарар баҕалаахпыт.

Васильева А.Н. Дьокуускай  куорат  33 №-дээх орто оскуола саха тылын,
литэрэтиирэтин учуутала,
«Уус-уран ааҕыы» түһүлгэтин салайааччыта