Дьокуускай куорат саха тылын, литературатын учууталлара ыраахтан олорон (дистанционнай) үөрэҕи хайдах тэрийбиттэрин туһунан
Муус устар 6 күнүттэн дойдуга коронавируһунан сибээстээн ыксаллаах быһыыга – майгыга муӊутуур бэлэм буолуу биллэриллибитинэн, үөрэх тэрилтэтэ бары ыраахтан олорон үөрэтиигэ көстө. Онон IV - с,түмүктүүр чиэппэрбит,барыбытыгар куйаар ситимин (интернет) нөӊүө саҕаланна.
Муус устар 4 күнүгэр Дьокуускай куорат үөрэҕин управлениетын үөрэҕи сайыннарар салаатын начаалынньыга Сыроватская Ульяна Гаврильевна «Zoom» нөӊүө Дьокуускай куорат саха тылын, литературатын учууталлара ыраахтан олорон (дистанционнай) үөрэххэ төһө бэлэмнэрин билэр сыаллаах ВКС оӊорбута. Ол мунньахха 32 учуутал кыттыыны ылбыта. 20 – с № оскуола учуутала Федорова Марианна Макаровна, Саха национальнай гимназиятын учуутала Кириллина Күндэлиинэ Трофимовна, Саха политехническэй лицей учууталлара Заболоцкая Ульяна Васильевна, Осипова Майя Виссарионовна иһитиннэриилэрин истибиппит. Платформалары ырыппыппыт, бэйэ – бэйэбитигэр сүбэ – ама бэрсибиппит.
Ыраахтан олорон үөрэммиппит нэдиэлэ буолла. Аны батсаап социальнай ситим нөӊүө учууталларбыт санааларын иһиттибит. Ону эһиги болҕомтоҕутугар таһаарабыт:
Александрова Анжелика Александровна, 3 – с оскуола: «Мин онлайн үөрэппэтим, СГО нөҥүө сорудахтары суруйан ыытабын, наадалаах ссылкалары ыйабын. Уонна арыый боростуойдук,ыарырҕаппаттарын курдук, сахалыы киинэ көрөн баран кылгастык өйтөн суруйаллар уонна мин телефонум нүөмэригэр, биитэр почтабар ыыталлар. Оҕолору кытта хардарыта сибээс баар буолара наада. Онтон биир саха тыллаах кылаастаахпын, кинилэргэ литератураҕа аудио эбэтэр видео устан ыытыам».
Петрова Жанна Николаевна, 7 – с оскуола: «Мин Zoom-нан,СГО-нан үөрэтэбин. Өйдөөбөтөхтөрүнэ, звуковой ватсабынан ыытабын».
Шишигина Лена Владимировна, Марха 1 –кы нүөмэрдээх оскуолата: «Туьанарым youtube, ayдио ааҕыы, хардарыта сибээһим - google форма - манна файл эбэтэр тургутук (тест) онотторобун».
Кириллина Күндэлиинэ Трофимовна, ЯГНГ: «Биһиги эмиэ онлайн уруоктарбытын Zoom плаформа нөҥүө, офлайн уруоктары СГО нөҥүө сорудахтаан, СГО РОСТ нөҥүө тургутуктаан,ыытабыт. Оҕолор үлэлэрин электроннай почта, СГО нөҥүө ыыталлар».
Сидорова Августа Семеновна, Тулагы орто оскуолата: «Мин Google Класс уонна Zoom туһанабын».
Ксенофонтова Клара Борисовна, 12 – с оскуола: «Мин эмиэ ZOOM-нан уруокпун ыытабын, Google Класс киирэн, тургутук оҥорон, хатылааһыҥҥа туттабын. Уонна социальнай сеть, ютубу иһитиннэрэн, сорудах биэрэбин».
Пестерева Надежда Ильинична, 26 – с оскуола: «Биьиги оскуола Discord, Zoom, Ютюб, СГО, Google форма үөрэтэбит».
Поротова Саргылана Егоровна, СПЛ: «Мин эми Zoom онлайн туттабын. Google форманан тургутук ыытабын, өссө Zoom, Google дискэбэр киирэн презентациялары, докумуоннары эҥин көрдөрөбүн».
Ноев Степан Олегович, Саха гимназия: «Мин сүрүннээн онлайн, видеоколл-уруоктарбын Zoom, Google Meet (Hangouts Meet) нөҥүө ыытабын. CГО, Google-диск платформаларын сорудахтары ыытарга туһанабын. Сорудахтарын СГО уонна эл. почтабар ыыттарабын».
Матвеева Надежда Аркадьевна, 38 – с оскуола: «Биьиги Discord ордук элбэхтик тутуннубут. Культура уруоктарыгар видеоклиптары, театр, музей ссылкаларын о.д.а элбэх эбит».
Атын да учууталлар, сүрүннээн, маннык хабааннаах эппиэттэри биэрдилэр. Бары эппиэттээбит учууталларга барҕа махталбытын тиэрдэбит.
Уопсай түмүккэ, учууталлар РЭШка курдук саха тылын, литературатын уруоктара бэлэм бааллара буоллар диэн баҕа санааларын эттилэр. Ол хайысхаҕа күүстээх үлэ барыахтааҕын ыйдылар.
Саха национальнай көрдөрөр – иһитиннэрэр хампаанньа (НВК Саха) нөӊүө тумус туттар учууталларбыт уруок бэлэмнии сылдьаллар. Яндекс. Тылбаасчыт (переводчик) өҥө сервиһэ саха тылын эбэн биэрдэ. Официальнай иһитиннэрии суох этэ. Билиҥҥитэ кини тестовой версияҕа киирэр, «Бичик» кинигэ кыһата саайтыгар «Төрөөбүт тыл», «Төрөөбүт литература», 5 – 9 кылаас учуобунньуктарын босхо хачайдаан ыларга анаан укта.
Онон саха тыла кэскиллээх, инникилээх диэн тураммыт, бу уустук кэмӊэ бары биир киһи курдук хамсанан үлэлиэххэйиӊ – хамсыаххайыӊ, оҕолорбутугар, инники кэскиллэрбитигэр, төрөөбүт тыл сүмэтин иӊэриэххэйиӊ диэн ыӊырабыт.
Марианна Макаровна Федорова, 20 –с нүөмэрдээх оскуола саха тылын уонна литературатын учуутала.
