«Тыыннаах тыл» бырайыак уонна төрөөбүт тыл декадатын чэрчитинэн ыытыллыбыт куораттааҕы дистанционнай «II олоҥхо олимпиадата – 2021»
2021 сыл олунньу 8 күнүгэр "Айыы Кыһата" национальнай гимназия саха тылын учууталлара, С.Н.Донской-II аатынан Үөрэҕи сайыннарар уонна идэни үрдэтэр института, Дьокуускай куорат үөрэҕин салалтата норуот тылынан уус-уран айымньы чыпчаала буолбут-олоҥхобут тылын-өһүн баһыылыырга, дириҥник билэргэ туһуламмыт үөрэнээччилэргэ аналлаах "Тыыннаах тыл" бырайыак уонна төрөөбүт тыл декадатын чэрчитинэн иккис сылын куораттааҕы олоҥхо дистанционнай олимпиадатын тэрийэн ыыттылар.
Олимпиада төрөөбүт тылга ытыктабылы, тапталы иҥэрэр, олоҥхону ааҕыыны көҕүлүүр, кэрэҕэ-сырдыкка угуйар, өбүгэтин үгэстэрин, култууратын, уран тылын-өһүн иҥэринэргэ бигэ тирэх буоларын өйдөтөр, олоҥхо уус-уран тылын-өһүн үүнэр көлүөнэҕэ тиэрдэр сыаллаах ыытыллынна. Олоҥхо олимпиадатын сорудахтара кылаас ахсын үөрэх ирдэбилиннэн бырагырааммаҕа бэриллибит олоҥхолорго тирэҕирэн ыытыллынна.
Олимпиадаҕа барыта 202 куорат уонна Таатта улууһун үөрэнээччилэрэ кытыннылар. Онтон 57 оҕо олоҥхо олимпиадатын кыайыылаахтара уонна призердара буоллулар. Олимпиадаҕа кыттыыны ыллылар СПЛ, ЯГНГ, Саха гимназия, «Айыы Кыһата», 7, 26, 33, 1, 2, 12, 21, 9, 31, 29 нүөмэрдээх куорат оскуолалара уонна Таатта улууһун лицейэ. Күндү үөрэнээччилэр, убаастабыллаах учууталлар биһиги олимпиадабытыгар көхтөөх кыттыыгыт иһин махтанабыт. Саха норуотун энциклопедията, бары күндүтэ мустубут музейа буолбут улуу олоҥхобут үүнэ, сайда, чэчирии турудун!
Липатова С.А., "Тыыннаах тыл" бырайыак Олоҥхо түһүлгэтин салачйааччыта.
