Эркээйи эргиирэ: оҕо, ыччат сайдар эйгэтин тэрийии бырагырааматын тула кэпсэтии түһүлгэтэ тэриллэн ыытылынна

Балаҕан ыйын 15 күнүгэр Дьокуускай куорат үөрэҕириитин үлэһиттэрин балаҕан ыйынааҕы сүбэ мунньаҕын чэрчитинэн Эркээйи эргиирэ: оҕо, ыччат сайдар эйгэтин тэрийии бырагырааматын тула кэпсэтии түһүлгэтэ тэриллэн ыытылынна.

Түһүлгэни Дьокуускай куорат Үөрэххэ управлениетын үөрэх сайдыытын салаатын салайаччыта Ульяна Сыроватская иилээн-саҕалаан ыытта. Дьокуускай куоракка сахалыы эйгэни тэрийэн олорор оскуолалар Эркээйи эргиирэ бырагырааманы иитэр-үөрэтэр үлэлэригэр сэргэ тутан, онно олоҕуран оҕо сайдар эйгэтин тэрийиигэ баай уопуттарын үллэһиннилэр. Бу бырагыраама тирэх буолар оскуолалартан бастакынан, Самсоновтар ааттарынан Хатас орто оскуолата «Кэрэчээнэ» оҕо уһуйаанын, «Ситим» айымньы дьиэтин, «Тускун» култуура киинин, Хатастааҕы оҕо искусствотын оскуолатын үлэлэрин-хамнастарын биир кэлим «Олоҥхо – олохпут ситимэ» бырагыраамаҕа түмэн көрдөрдүлэр. ​ «Айыы Кыһата» Дьокуускайдааҕы национальнай гимназия «Олохсун – школа жизни» бырагырааматын билиһиннэрдэ. Саха гимназиятыгар оҕо сайдар эйгэтин сайыннарыылаах үөрэх технологияларын туһанан тус бэйэҕэ туһаайыылаах үөрэҕи, иитиини тэрийиигэ өр сыллаах үлэлэрин сиһилии кэпсээтилэр. Бары бэлиэтээбиттэрин курдук, билиҥҥи оҕолор сайдан, ситэн-хотон киһи буолан, олохторун оҥостоллоругар биллэр ыарахаттар үөскээтилэр.

Ону хайдах быһыылаахтык үлэни-хамнаһы ыытан, төрөөбүт тылга, төрүт култуураҕа, үтүө өбүгэ үгэстэригэр тирэҕирэн тоҕоостоохтук ыытарга сүбэлэстилэр. Хас биирдии оскуола ис кыаҕын туһанан таска тахсан сахалыы эйгэни кэҥэтиигэ куорат үрдүнэн биир сыллааҕы былааны торумнаһарга сорук туруоруннулар, бииргэ үлэлииргэ бэлэмнэрин бигэргэттилэр.

ОРО